حكايات من هنــا -1

        

  باش مهندس مهيد من أكفا المهندسين الطبيين اللاقيتهم في حياتي العملية الصغنونه ..

بعرف حاجات اكتر من مدير القسم  وكل المستشفى بتثق فيه..

إذا مسك جهاز إلا يتصلح حتى يفكوا ،،

دخل الجيش عشان يضمن شغل ومرتب شهري تابث زيو زي كتير من الشباب،،

خاطب بت عمتو من 3 سنين وللآن ما قادر يلم حق العرس
المرتب لايتعدى الـ400 جنيه ! ،،،، دخل صندوق بـ 200 جنيه ..!! وبرضو الحساب ماغطى المتطلبات ...!

في الآخر قال لينا : انا اقصى حاجه ممكن المها 4 مليون،

مهندس معانا قال ليه : في حاجه اسمها متكفي !! اديهم الاربعه دي وخليهم يتصرفو!

رد مهيد : بالله .. صح في حاجه اسمها كده يا إيمان .؟

قلت ليه : ااي وانت لو اتفقت مع البت مافي مشكله والناس ديل اهلك واقلهن مهرا اكثرهن بركه

قال : انا اصلا ماداير حفله وعزومه صغيره على قدر الحال وبديهم 3 مليون بس!

ساعتها ضحكنا على الحال العوج ... !

وانا في طريقي للبيت -في المواصلات- ركبو جمبي بنتين ..

الاولى : قال ليها 30 مليون متكفي .. قلت ليها اوعك ترضي ليه!

التانيه : بالغ .. 30 مليون دي تسوي شنو ولا شنو ؟؟ مابتكفي نهااائي

الاولى : ااي انا قلت ليها 45 كويسه وهو ماشاء الله القروش عندو رآآآقده

التانيه : صآح كلامك والله مافارقه معاه شديد اصلا !!

ولكـــــــم ان تتخيلو حجم الدهشه الاعترتني وانا قبل دقايق كنت بتكلم مع مهيد عن الـ 3 مليون الـ  حـ  تكفي!!!!!!!

:

بالله في ناس في البلد دي كـــده وناس كــده ايه الفروقات الواسعه الشاسعه دي ؟؟!!!

:

لما حكيت لـ مهيد بـ كلام البنات  قال لي : نفسيــآت .. مش العرس ده خليتــــــــــــــــــوووو!!

ماعارفه ليه كانت مقولة امي هي التعبير الوحيد الجوه راسي :

"يقولو ليك عرس بـ العديــل والزيـــن و بكره مافي زول يجي يشيل معاك ام اضنين"

طبعا ماقلت الكلام ده لـ مهيد عشان ما يخليّ العرس بالجد جد !!!!

*ام اضنين دي قفة الخضآر !

إيمـ.